繼海皇粥店突然宣布全線結業後，又傳「鴻星飲食集團」即將自願清盤，有關集團當然加以否認，但若財政穩健，又怎會多個舖位出現多月欠租的情況？就連新地亦加入追租的行列，這樣的消息壓力下，無事都變有事，尤其是這些連鎖式經營，一蝕就多間蝕，一間一個月蝕100萬，十間就千萬，一年就一億有多！
無生意時，唔好話千萬，幾萬都搵唔到，企業要倒閉，話都無咁易！羅馬非一天可建成，但可以一晚就塌下來。企業老闆一轉念，認為無可能再頂下去，明早就即時結業！
做生意，有時真唔到你觀望多一陣，可能是你個人命格，亦可能是經濟大勢所趨，要無起生意上嚟，真係可以好嚇人，你唔及時抽身，會被拖累得永不見人生。
我自己就曾經歷過兩次這種思危，一次是高考轉制到DSE，我意識到補習這產業將好景不再，決定立時收縮，當時同事和老師想說服我，說當下生意仍不差呢！？為何不觀望多一段日子才作決定。我思前想後，最終認為一旦拖拉收缩決定，成本不菲，那時月租十萬左右，若無學生，一年怎交百多萬租！？過去賺既都要嘔返出嚟，所以我陸續不再續租，離開我經營了十多年數層的太子大生大廈，高峯期我租了這幢大廈五層，那時有個想上位的Econ 老師，見我甩一層他就租我那一層，大有欲取代我在那大廈經營Econ補習之勢，我那時心想：「真係你要死唔比你死咩！」
結果，他經營多層不夠一年，要撻租離去。
第二次是我經營日系時裝，本來幹得不錯，直迫當時的龍頭店子，但我看到那時流動科技發展一日千里，網購勢如破竹，我又是即時決定再不經營下去。
兩年後的某個早上，分別有兩位舊同事傳訊息給我，告訴我有報導，那間龍頭公司欠租欠人工要走佬！說我走得及時。
這兩次雖能光榮結業沒欠街數，但經驗更寶貴，教我明白，做生意其實好凶險，稍稍在決策上有所延誤，隨時沒頂，永不翻身！只因你任何經營，都有很多成本是要簽長約的，舖位固然要簽兩年，就是當時補習用的影印機，也要5年約，一旦簽定，然後隨即突無生意，你咪話唔腳軟！
你可能會話，有無咁易無生意！？對呀！過去的香港經濟，數十年來總的來說都是走上，很多經營者都試過死裏逃生，每次生意下跌時又因經濟強力復甦而反彈上來，我高考廿年補習都試過三次危機，但都否極泰來，且更上一層樓。
企業經歷過幾次這種際遇後，膽子就大，不識死，認為最終必定跟過往般可守過去，但今時不同往日，香港已進入另一個長期經濟態勢，這種樂觀思維，極其危險，不要說生意能否守得住，自保也隨時出現問題。
當下，已愈來愈多經營者意識到這「觀望」所帶來的殺傷力，根本無得守，寧見好即收，紛紛「光榮」結業，特別是一些老字號，還望給社會一個美好的集體回憶。
因為這種思危心態已漸趨普遍，未來的商舖價值，會跌得更低，我估計由高位跌足9成！
