我有位舊生，是我九零年代尾的學生，他也四十出頭了，人生閱歷豐富（當然，我所有舊生都係），有次，他跟我分享：「Sir，你唔好對號入座呀！其實那個高考補習年代，外行人睇d補習老師，就係：「乜柒都唔識！」我跟他是在telegram 對談的，我聽到他這樣說，暗裏笑起來！
我不能同意更多！
說實在，九零年代那十年的補習風氣跟二千年後是有微妙不同的，也許是後者互聯網已存在吧！我頭十年補習，即九零年代，未有互聯網，補習市場很「靜」，各自各做，少有是非，而當時我地做補習，大多都心知肚明，搵食啫！談不上要被崇拜。偶爾有學生欣賞我們的教法，加以向同學與朋友推介，令我們多些生意，當然心存感激。
那個安靜的時代，不存在補習明星，最多也是欣賞老師盡心盡力的教導。
然而，踏入二千年後，互聯網興起，令補習老師的名字天天在網上討論區出現，相當矚目，令新一代的補習老師，視自己為半個明星，要個個補他們的學生成為他們的粉絲，有些甚至要開宗立派，人前人後口裏常掛著門生前門生後，好肉麻！且有派系之分，譬如我叫Alex ，學生就叫Alexian ，哈….. 認真無聊！我曾有學生，受當時這種氛圍所影響，想咁叫我，我好認真咁同佢講：「乖！唔好咁低能！」
我心諗：「大佬！我出泥搵食啫，只係要錢！無興趣做一派之主。」我始終係老一蛻補習老師，唔係咁接受二千年後呢d氹細佬祟拜的手法！
其實，我地提供教學服務，你覺得物有所值，咪得咯，唔駛當我偶像。補習老師大多其貌不揚，有鬼資格做明星咩！四份一個都談唔上。
但嗰個年代d學生，偏偏會受呢套，佢地d說話，我聽到都噴飯，話邊個邊個補習老師好好，上堂教埋佢地做人道理；呢d 學生既feedbacks ，我真係覺得莫明其妙，明明班友一畢業就出泥做補習，見過既世面極少，憑乜資格教學生做人；我自量呀！上堂過場只會講笑話娛樂下大家，至於人生道理，我今日仲學緊，唔曉教人！
那個年代既補習老師，10個有9.9個都係井底之蛙（包括我），學生跟他們學人生，是跟蛙蛙看天下。
教考公開試我地就叻，至於點做人，中學d老師為博升SGM，手段仲叻過我地，更何況相對於商界混的人，我地就更加乜春都唔識！
所以，嗰時我每每聽到學生呢d說話：
「我有幸上到乜乜既堂！」
「乜乜真係我恩師！」
「阿乜乜好好人！」
我心諗，你地比學費架，我地交足工夫係本份，有乜野大小確幸同恩乜師呢！至於我好唔好人，呢句真係超幼稚！各人有各自的立場與利益，有好人分到出嚟既咩！同埋，我好唔好人，關你鬼事咩！我教到你考好公開試咪得咯！
可能你嗰時都天真過，接受過呢種畸型的客服年代。
